പ്രണയ രുചി 

പ്രണയത്തിന്റെ ലോകമെതെന്ന 

ചോദ്യത്തിന് കാടും 

കടലും ആകാശവും 

ചൂണ്ടി ഉത്തരംനല്കി  

പ്രണയത്തിന്റെ വികാര

മേതെന്ന ചോദ്യത്തിന് 

ചൂടെന്നും തണുപ്പെന്നും 

ചിരിയെന്നും കരച്ചിലെന്നും 

മറുപടി നല്കി കണ്ണടച്ചു 

അവയെ ആവാഹിച്ചപോലെ 

തൊടുന്നപോലെ 

കാതിൽ വീണ  ചോദ്യത്തി 

ലാണുണർന്നതു 

പ്രണയത്തിന്റെ രുചിയോ 

പാതികടിച്ച കപ്പലണ്ടി 

മിട്ടായിയുടെ രുചിയെന്നു 

ചൊല്ലുമ്പോൾ 

നിന്നുമി നീരിൽ നിന്നാ മധുരമെൻ 

നാവിൽ പുഴപോലൊഴുകി 

 

പക്ഷി 

ഉള്ളിലെ പക്ഷി 

ചിറകടിച്ചു കരയുന്നു 

ആകാശ പൊയ്കതൻ 

നീലിമ തേടുവാൻ 

വിലക്കുകൾ ചിറകരിഞ്ഞു 

ചിരിക്കുന്നു 

സ്വപ്നങ്ങൾ ഇനിയുമേറെ 

അകലത്താണ് പോലും 

എന്റെ ഗ്രാമം  ഒപ്പം ഞാനും 

ഓടുന്ന ജീവിത പായാര വണ്ടിയിൽ 

ഓർമ്മകൾ മാത്രമെൻ സ്വന്തം 

നഗര പെരുമയുടെ 

നനവില്ലാമണ്ണിലായി 

ഓർമ്മകൾ മാത്രമെൻ സ്വന്തം 

പച്ച പിടിച്ചോരാ  ഊടുവഴികളിൽ 

ഇന്നും ഞാൻ ഓടിനടക്കും 

കാട്ടു പച്ചയും വേലി പരുത്തിയും 

വകഞ്ഞു ഞാനിന്നുമതിരുകൾ താണ്ടും 

വാൽ പൊക്കി ചിലയ്ക്കുമണ്ണാറ 

കണ്ണനോടു ഒരു മാമ്പഴം ഞാനിരക്കും 

ഓലത്തുമ്പിൽ ചാഞ്ചാടും ഓലഞ്ഞാലി 

കിളിയോടും ചാഞ്ചക്കം മെല്ലെ പഠിക്കും 

പുളിമരകൊമ്പിലെ കാണാ കൂവലി

നൊത്തു  ഞാനപസ്വരം കൂവും 

വള്ളികൾ കാവുകൾ ഒക്കെ കടന്നു 

 തേവരുമായി  ചങ്ങാത്തം കൂടും 

കറ്റയറുത്ത  പാടത്തൂടോടി ഞാൻ 

പട്ടത്തെ കാറ്റിൽ പറത്തും 

പിന്നലെയോടുന്ന ആട്ടിൻ കുഞ്ഞിനെ 

മാറോടു ചേർത്തു ചിരിക്കും 

കുതറി പ്പിടഞ്ഞവൾ നെഞ്ചിൽ 

ചവിട്ടുമ്പോൾ അലറിവിളിച്ചു ഞാനോടും 

പാടത്തിൻ നടുവിലെ ആമ്പൽ പൂകണ്ടു

 ഞാൻ  കൈനീട്ടി ചെല്ലുന്നനേരം 

ഇലയോടുചെർന്നൊരുപാമ്പിൻ തല കണ്ടു 

പ്രാണനും കൊണ്ട് പറക്കും 

വയലറ്റ്പൂക്കൾ വിരിക്കുമാ പാടത്തെ 

ആഫ്രിക്കൻ പായൽ പടർപ്പിൽ 

കുളക്കോഴി കുടുംബത്തെ കാണുവാനായി 

ഞാൻ ഒളികണ്ണു  നീട്ടി  പതുങ്ങും

മീനും തവളയും ആമയും ചേർന്നൊരു 

കൂത്തരങ്ങാടും കുളത്തിൽ 

ചൂണ്ടയും കോർത്തു  ഞാൻ പമ്മിയിരിക്കും 

കൊത്താത്ത മീനിനു വേണ്ടി 

ചെങ്കൽ പാത തൻ തുമ്പിലെ കോവിൽ 

നടയിലേക്കു ക്ക് മന്ദാര മാല കൊരുക്കും 

കൃഷ്ണനു നല്കി മെല്ലെ ചിരികുമ്പോൾ 

പകരമൊരു  ചിരി തേടും 

ആൽമരം ചുറ്റി നടന്നുതൊഴുത്‌ 

നേർച്ച വെടി കേട്ടു ഞെട്ടി പകയ്ക്കും 

ആൽ തറ തന്നിലിരുന്നെൻ ചന്ദനം 

ആലിലത്തുമ്പിൽ മടക്കും 

ഗ്രാമീണ വായന ശാലയിലായി ഞാൻ 

അക്ഷര സ്വർഗങ്ങൾ തേടും 

രമണനും ചന്ദ്രികേം ചേർത്ത് പിടിച്ചു 

ഞാൻ കാതങ്ങളോളം നടക്കും 

ഷാപ്പിലെ ചിരിയൊച്ചകൾ ക്കിടയിൽ 

ഞാൻ അച്ഛന്റെ  മുഴു ചിരി പരതും 

ആടുന്ന കൈകളിൽ മുറുകിയിരിക്കുന്ന 

പൊതിയഴിചെടുത്തു ചവയ്ക്കും 

ഓല കൊട്ടക തന്നിലെ യുഗ്മ 

ഗാനങ്ങളിൽ ഞാനെന്നെ മറന്നു ചിരിക്കും 

എവിടെയോ സൈക്കിളിൻ ബെല്ലടി കേട്ടു 

  ഇർക്കിലി ഐസു  കാരനെ തേടി ഇറങ്ങും 

പിന്നെ യറിയും ഞാനിതെല്ലാം നടന്നതെൻ 

ഓര്മ്മ തൻ പൂമുഖത്തെന്നു 

ഗദ്ഗദം മെല്ലെപടരുമെൻ ചിന്തയിൽ 

ഓർമ്മവിട്ടിറങ്ങുന്നതോർത്തു 

എന്നാലുമാഹ്ലാദമാണെനിക്കെന്നുമെൻ 

ഗ്രാമത്തെ കുറിച്ചോർക്കാൻ 

എത്രയെത്ര പറയാ കഥകളുണ്ടിനി 

എൻ ഗ്രാമത്തിൻ സ്വന്തമായി സത്യം 

 

 

 

അക്ഷരം വിഴുങ്ങികൾ 

ചിരിക്കാനും കരയാനും 

ചിഹ്നങ്ങൾ പിറന്നപ്പോൾ 

"ഹ "യും "ഹി "യും 

യാത്ര നിർത്തി 

ചിഹ്നങ്ങളുടെ കൊഞ്ഞനം 

കുത്തൽ സഹിക്കാഞ്ഞു

 .

അക്ഷരങ്ങളെ വിഴുങ്ങിയ 

ചിഹ്നങ്ങളെ എനിക്ക് ഭയമാണ് 

എന്നാണാവോ നിന്റെ മുഖത്ത് 

ഇവ പാര്പ്പിടം കെട്ടുക  

യാത്ര 

കണ്‍ പോളകളിൽ കനംവച്ചു 

ഉറക്കം പച്ച തെളിക്കുന്നു 

മനസിന്റെ വെള്ളിത്തിരയിൽ 

സ്വപ്നത്തിൻ ചൂളം നിറച്ച് 

യാത്ര തുടങ്ങുവാൻ .

ജീവിതവും പ്രണയവും
തുലാസിന്റെ തട്ടികൾ
കയയ്ടക്കിയപ്പോൾ
ഞാൻ അനാഥത്തിന്റെ
ഒറ്റയടിപ്പാതയിലായിരുന്നു

സ്വപ്നം
പൂർണമായ സ്വപ്നത്തിൽ നിന്നും
അപൂർണമായ ജീവിതത്തിലേക്ക്
വേച്ചു പകച്ചു നില്ക്കുമ്പോഴും
സ്വപ്നത്തിലെ തുരുത്തിൽ
മനസു തീകായുകയായിരുന്നു
ശരീരത്തിന്റെ അങ്കലാപ്പുകൾക്ക്
മറുപടികൊടുക്കാതെ .

കത്തി 

പ്രണയത്തിന്റെ കത്തി കണ്ണിലൂടെ 

ഇറക്കി നീ മനസ് മുറിച്ചെടുത്തു 

ചോരചിന്താതെ 

അടര്ന്നു വീണ പൂക്കളിൽ പൊതിഞ്ഞു 

വൈരാഗ്യത്തിന്റെ കത്തി 

ഹൃദയത്തിൽ ഇറക്കി നീ 

മനസ് തിരികെവച്ചു 

ചോരയൊഴുകി 

വേദനയിൽ പിടഞ്ഞു ഞാൻ മരിച്ചു 

എന്റെ കവിത 

ബാല്യത്തിൻ മോഹങ്ങളാണെൻ കവിത 

ബാല്യനഷ്ടങ്ങളാണെൻ  കവിത 

കൌമാര സ്വപ്നങ്ങളാണെൻ കവിത

കൌമാര വിഹ്വലതയാണെൻ  കവിത  

 യൊവ്വന ദാഹങ്ങളാണെൻ  കവിത 

യൌവ്വന സീമകളാണെൻ  കവിത 

ജീവിത ദൈർഘ്യമാണെൻ കവിത 

ജീവിത പാഠങ്ങളാണെൻ കവിത 

പ്രണയ കുതൂഹലമാണെൻ കവിത 

പ്രണയ സ്പന്ദനങ്ങളാണെൻ കവിത  

വിഷാദ സാന്ദ്രങ്ങളാണെൻ കവിത 

വിരഹ വ്യഥയിലാണ്ടുഴലുന്നെൻ കവിത   

ഏകാന്തത യിലെ തോഴിയെൻ കവിത 

ആൾക്കൂട്ടത്തിലെ  താങ്ങെൻ  കവിത 

ചിന്തയിലൊരു മണികിലുക്കമെൻ കവിത 

ചിന്തയ്ക്ക് മേലൊരു പകർന്നാട്ടമെൻ  കവിത 

എന്നുള്ളിലെവിടെയോ കുടിയിരിക്കുന്നൊരു 

എൻറെ പ്രതിരൂപമാണെൻ കവിത 

ഓർമ്മയിലെ കളിവള്ളം 

പുതുമഴയ്ക്കൊപ്പം 

തുള്ളിയാർത്ത മീനുകൾ 

ചാടി പിടഞ്ഞു 

വീഴുന്നുണ്ടാവാം  

പാടത്തിൻ നടുവിലെ 

ചെങ്കൽ പാതയിലിപ്പോഴും 

നഗരത്തിൻ വേഗമെൻ 

 ചിന്തയിൽ ക്ഷീണമേറ്റുന്നുണ്ടെങ്കിലും

ഓർമ്മകളിപ്പോഴും 

പാടവരമ്പിൽ

 കളിവള്ളമിറക്കുന്നു  

ഓർമ്മകളിന്നും

 നീന്തി മുന്നേറുകയാണ്‌ 

കൽ പടവുകളില്ലാത്ത

ബാല്യത്തിൻ ആമ്പൽകുളത്തിൽ 

ഇടനാഴികള്‍ 

ഇടനാഴികള്‍ക്കെപ്പോഴും  

വെളിച്ചം  കടംകഥയായിരുന്നു 

എന്നാല്‍ 

പ്രണയത്തിന്‍റെ മുല്ലപ്പൂമണം 

സുപരിചിതവും 

ആധുനികതയുടെ കച്ചവട തന്ത്രങ്ങള്‍ 

പ്രണയത്തില്‍ ചൂഷണ വിഷം

കലര്‍ത്തി  മറഞ്ഞു   നിന്നപോഴാണ് 

ഇടനാഴിയില്‍ നിയോണ്‍ 

ബള്‍ബുകള്‍ വെളുക്കെ ചിരിച്ചത് 

നിക്ഷേപിച്ചു പോകുന്ന 

രഹസ്യങ്ങളെ പരസ്യ പെടുത്താന്‍