വരിക കുഞ്ഞേ

മറു വിളി നൽകാതെ
ആര്ത്തു വിളിച്ചും കൊണ്ട്
തൊടിയിടങ്ങളിലോടി നടന്നും
പച്ച തലപ്പുകൾ പരക്കെ പൊട്ടിച്ചും
കിണറിൻ മുഖപ്പിൽ കാലെത്തി നോക്കിയും
കുറുമ്പുകൾ കാട്ടി, കൊഞ്ഞനം കുത്തിയും
മെയ്യിൽ മെഴുക്കും വിയര്പ്പും കുഴച്ചു
ചാരത്തണയാതെ തലങ്ങും വിലങ്ങുമായി
നീട്ടി നിൽക്കുന്നെരെൻ കൈകളെ നോക്കാതെ
കുസൃതി കൂട്ടി ചിരിക്കയാണെൻ
അക്ഷര കുരുന്നവൻ
വരിക വന്നമ്മ തൻ മടിതട്ടിലിരിക്കുക
ഇറുകെ പുണർന്നമ്മ ഇളം ചൂട് തന്നിടാം
കുഞ്ഞിളം കാതിൽ കഥകൾ പറഞ്ഞിടാം
കുരുന്നു കാൽ വെള്ളയിൽ
കുഞ്ഞുമ്മകൾ തന്നിടാം
കണ്ണുകൾ കൊണ്ടൊരു ചിരി പകർന്നിടാം
നിൻ ചിരിയിലൂടമ്മയൊന്നു ചിരിചോട്ടെ
ഇന്നലെ പെയ്ത മിഴികൾ തോര്ന്നോട്ടെ .